أخصائي أمراض الأسرة 2017
اليوم راح نحجي عن موضوع مهم جدا يهم جميع الناس وبالذات
مرضى السكري من النوعين الأول والثاني . يعني شنو النوع الأول والنوع الثاني بله؟
أكو نوعين من داء السكري ، النوع الأول : أو اللي كانوا
يسموه النوع المعتمد على الانسولين لكن اليوم كاموا يسموه النوع الأول (بعدين نشرح
ليش) ، وهذا علاجه الانسولين حصرا . والنوع الثاني اللي هو غير معتمد على
الانسولين كما كان يعرف سابقا علاجه حبوب مخفضة للسكر مثل الداؤونيل و كلوكوفيج
وغيرها ، ولا تدخلونه بموضوع طويل وعريض لأن يرادنه ساعات وليالي حتى نكمل موضوع
السكري . خلينة نرجع للحوارية عيوني وخليكم وياية وفتحوا أذهانكم زين لأن هذا
الموضوع صدك عاجبني.
س1/ شنو معنى السكر التراكمي وشنو بالإنكليزي؟
ج1/ بالإنكليزي يسموه (Hb A1c) (glycated haemoglobin) ، يعني شنو ؟ آني أكلك :
انت سامع بالهيموغلوبين اللي هو البروتين الموجود بداخل الكريات الحمراء في
الدم ، مو صحيح؟ اللي وظيفته نقل الأوكسجين من الرئتين الى كل خلايا جسم الانسان.
زين شنو علاقة هذا بالموضوع؟
العلاقة هي أن هذا الهيموغلوبين يتحد بسكر الجلوكوز اللي موجود بالدم عندما
تزيد نسبته، وهو هذا اللي سميناه (glycated haemoglobin) . ومن يدزك
الطبيب على هذا الفحص ، معناها يريد يشوف هل انه السكر عندك مأثر بيك لو لا ؟ وهل
أنت عندك سكر ومتدري لو لا.
س2/ والله صارت رطينة عندي ، شلون راح يعرف ، خو نسوي فحص السكر بالدم ونفض
المشكلة؟
ج2/ لا ، مو هيج الحجي ... فحص نسبة السكر التراكمي ينبئنه بشكد انت مسيطر
لو ما مسيطر على نسبة السكر للأسابيع العديدة او الأشهر القليلة الماضية(حوالي
ثلاثة اشهر سابقة) ، مو اليوم والبارحة بس ، خو الطبيب يعرف يدزك على فحص السكر
العادي ويفض المشكلة . وهم أكول شلون يعرف ؟
س3/ صدك شلون يعرف ؟ فسر لي ؟
ج3/ ماشي، انت تعرف شكد تعيش كريات الدم الحمر بالدم؟ أكيد ماخذهه
بالمتوسطة. الكريات الحمر تعيش من 8-12 اسبوع يعني انته والثلاثة اشهر وقسم يكولون
اربعة اشهر وبعدهه تتحلل وهذا يعني اذا
كان السكر بالدم زايد ومعلك كل هاي الفترة ودائما فوق المعدل الطبيعي معناهه الفحص
راح يطلع عالي لأنه الهيموغلوبين المحمل بالسكر موجود بداخل هاي الكريات ولكل هذه
الفترة (بعمر الكريات الحمراء).. هسة صارت الفكرة واضحة؟
س4/ رحم الله والديك ... على هذا التوضيح ... تقريبا طخت عندي.. يعني نكدر
نعتبر هذا الفحص مثل الكيج طويل الأمد للسيطرة على نسبة السكر في الدم؟
ج4/ بالضبط هو فعلا كيج ، اذا كانت مستويات السكر عالية للأسابيع القليلة
الماضية أو ثلاثة أشهر سابقة ، فنتوقع قراءة السكر التراكمي حتكون عالية ايضا.
س5/ زين شكد النسبة الطبيعية لهذا السكر عند مرضى السكري وعند الناس العاديين؟
ج/ النسبة الطبيعية مهم أن نعرف أنها تختلف على ثلاثة اشكال ، كلي شنو هيه؟
الحالة الأولى اذا قسناهه وطلعت النسبة أقل من 6% (أو أقل من 42 ملي مول /
مول) هذا يعني أن الشخص طبيعي وغير مصاب بالسكري .
الحالة الثانية تكون النسبة من 6% الى 6,4% هنا راح يصير شك بالموضوع يعني
ممكن أن يكون الشخص يعاني من بدايات الاصابة أي ما تسمى (قبيل السكر ) أو (Prediabetes ) وهنا لازم يدير باله زين خاف
بعدين يطيح بيهه.
الحالة الثالثة هي أن تكون النسبة اكثر من 6,5% وهنا الشخص مصاب بالسكري قطعا.
س6/ زين بروح أبوك هذا الفحص جديد مكتشفيه لو قديم أشو مكنا نسمع بيه ..
احجيلي شوية عن اكتشافه ومنو اكتشفه يرحم والديك لأن آني أحب التاريخ.
ج6/ تدلل ... أول من فصل هذا النوع عن الأنواع الأخرى من الهيموغلوبين هو
(هوسمان و مايرنك) عام 1958 وأول من صنفه كـ كلايكوبروتين هو (بوكين وكالوب) عام
1968. أول من وصف زيادته عند مرضى السكري هو (صاموئيل راهبار وزملاؤه) عام 1969.
أما أول استعمال لهذا الفحص لمراقبة ومعرفة مدى السيطرة على مستويات السكر عند
مرضى السكري فكان على يد (أنتوني سيرامي) عام 1976. يعني الشغلة قديمة حيل. ودائما
توصلنه الشغلات البيهه خير متأخرة.
س7/ زين كلي هذا الهيموكلوبين المليان كلوكوز ممكن يرجع طبيعي بعد ما نسيطر
على نسبة السكر بالعلاج و شكد يرادله فترة يلله يرجع؟
ج7/ هذا خوش سؤال.. بس خلي أحجيلك شغلة.... هذا الهيموكلوبين من اتحد
بالكلوكوز بسبب سوء السيطرة على نسبة السكر بالدم مو بسهولة يتخلص من هذا السكر
اللي لزك بيه يعني مثل ما كلنه يراد تنتهي فترة حياة هاي الوجبة من الكريات الحمر
(يعني 120 يوم تقريبا) وتستبدل بغيرهه جديدة وبنفس الوقت لازم نسيطر على مستوى
السكر في الدم بشكل صارم حتى نتوقع نزول نسبة السكر التراكمي. يعني بنفس الوقت
قياس نسبة هذا الهيموكلوبين يفيدنه حتى نعرف احنه شكد برنامج علاجنا للسكر ناجح لو
لا .
س8/ شكد لازم ننتظر مع العلاج الجيد حتى نحصل على نسب مقبولة من السكر
التراكمي(A1c) ؟
ج8/ خوش سؤال. الدراسات العملية والخبرة المتراكمة تكول نحتاج الى 20 يوم
تقريبا من العلاج الجيد والسيطرة الناجحة على نسبة السكر حتى نحصل على نسب متناقصة
من (HbA1c). يعني اذا اجاك مريض عنده سكر ومخربط
ودائما صاعد صاعد راح تبدي وياه برنامج جديد وصارم من العلاج سواء الانسولين
(بالنسبة للنوع الأول من مرض السكري) أو حبوب السكري (بالنسبة للنوع الثاني)
وننتظر 20 يوم ونكوله للمريض راح نعيد الفحص بعد هاي الـ 20 يوم راح نتوقع نزول
النسبة.
س9/ حجي ذهب .... زين خلي نروح لتفسير النتائج اللي نحصل عليهه من ندز
المريض على التحليل؟ شكد القراءة المطلوبة واللي نكدر نطمئن المريض من تطلعنه؟
ج9/ طبعا القراءات اللي ممكن نتوقعهه تعتمد على الطريقة المستخدمة في
التحليل ؟
س10/ يعني هم أكو طرق مو طريقة وحدة؟
ج10/ أكيد ؟
س11/ يا طريقة معتمدة ونسويهه بسهولة؟
ج11/ أكو أنواع وهي:
1.
High-performance liquid chromatography (HPLC): The HbA1c result is
calculated as a ratio to total hemoglobin by using a chromatogram.
2.
Immunoassay
3.
Enzymatic
4.
Capillary electrophoresis
5.
Boronate affinity chromatography
بس أهم الأنواع هي الاميونوأسي (immunoassay ) والبورونيت
(الخامسة بالتسلسل).
س12/ زين شلون راح نفسر النتائج؟ يعني كل الناس نفسرلهم النتيجة بنفس
المقاييس لو أكو اختلاف؟
ج12/ أكيد تعتمد التفسيرات مال النتائج على عدة عوامل منها الطريقة
المستخدمة بالفحص ، وعمر المريض، والاختلافات البيولوجية بين الاشخاص.
س13/ شويه وضحلي أكثر؟
ج13/ أوك . مثلا: عدنه شخصين قياس سكرهم متساوي تقريبا، ممكن أن نلكه السكر
التراكمي مالتهم مختلف بنسبة حوالي 3% ، وهاي دراسة تكول هذا الحجي وتحتاج الى بحث
عميق.
س14/ زين اكو حالات أخرى أو أمراض ممكن تنطينه نتائج مخربطة ومنعتمد عليهه؟
ج14/ طبعا أكو حالات تعطينه نتائج منكدر نعتمد عليهه ونعول عليهه مثل : بعد
نزف الدم أو فقدان الدم (blood
loss)، بعد اجراء عملية جراحية، نقل
الدم (blood transfusions) ، فقر الدم (anemia) ، أمراض الكبد أو الكلية المزمنة، أو بعد أخذ جرعة عالية من
فيتامين سي ، أو العلاج بــ (الارثروبويتين )(
erythropoetin).
س15/ زين أكو فد شي يسمونه المدى المرجعي أو الرفرنس رينج (reference range) مو صحيح؟
ج15/ صحيح . يعني هسة تريد مني هذا الرفرنس رينج مال السكر التراكمي
بالاشخاص الاصحاء وبالمرضى ، هذا اللي افتهمته من سؤالك؟
س16/ اي والله ... حتى أكدر اعتمد عليه بالتشخيص ظ
ج16/ ماشي. بشكل عام الرفرنس رينج (يعني المدى المرجعي الطبيعي يعني كل
القراءات اللي واقعة ما بين هذين الرقمين هي طبيعية بالاضافة الى الرقمين الحد
الاعلى والحد الادنى) بالنسبة للسكر
التراكمي عند الشباب الاصحاء ينحصر ما بين 30-33 ملي مول / مول يعني 4.9-5.2 % .
أما المتوسط عند الأشخاص المصابين بداء السكري من النوع الأول (Type 1 DM) هو 63 ملي مول / مول يعني 7.9 % و للأشخاص المصابين بداء السكري
من النوع الثاني(Type 2 DM) هو 61 ملي مول /مول يعني 7.7 %.
س17/ الله يرحم والديك... بس هاي الأرقام شلون خاف انساهه ؟
ج17/ حتى لو تنساهه راح تلكاهه مكتوبة بورقة المختبر اللي سويت عنده
التحليل.
س18/ زين كلي يعني الاشخاص المصابين بالسكري من كلا النوعين يبقه عدهم
السكر التراكمي مرتفع دائما ويمته نعتبرهم مسيطرين على مستويات السكر بدمهم؟
ج18/ لا . احنة لازم نعرف انه اذا بقة مستوى السكر بالدم عالي ولفترات
طويلة عند المصابين بداء السكري فمعناه ان السكر التراكمي راح نتوقعه عالي ايضا. وهنا
لازم نخلي مدى الهدف (target
range) لهذا السكر ضمن الطبيعي وهو هذا
اللي نتوقعه عند الاشخاص اللي يتابعون علاج السكر عدهم بشكل جيد.
س19/ زين أكو دراسات تكول انه القراءات مال السكر التراكمي الهه علاقة
بحدوث مضاعفات السكري؟
ج19/ نعم. أكو دراسات ضخمة في أميركا وفي الغرب وجدت أن تخفيض ما نسبته 1
ملي مول / مول من السكر التراكمي ينفع في تخفيض نسبة هاي المضاعفات حوالي 3% . وهاي
نسبة جيدة جدا. وخلي ببالك انه ماكو داعي ننزل بالقراءات أقل من الحد المقرر
والأدنى يعني بالتقيد الأكثر من المطلوب من قبل المرضى وما راح يفيدنه بشي بل
بالعكس ربما تضر المريض مثل مخاطر هبوط نسبة السكر بسبب الريجيم القوي. يعني لا
افراط ولا تفريط مثل ميكولون.
س20/ زين ممكن نلكه أشخاص أو مرضى يطلع عدهم السكر التراكمي أقل من
الطبيعي؟
ج20/ والله أسئلتك حلوة ودائما تذكرني بشغلات حلوة. هسة راح أجاوبك ... احنة
حجينه فوك اذا ما نسيت ان الكريات الحمراء تعيش تقريبا ثلاثة اشهر مو صحيح؟ ونتوقع
اذا كان السكر عالي خلال هاي الفترة فمعناهه انو السكر التراكمي يطلع عالي خلال
هاي الفترة . اذن هناك بعض الحالات اللي يقل بيهه عمر الكريات الحمر نتوقع قراءات
السكر التراكمي (Hb A1C) اقل من المتوقع مثل G6PDD (glucose-6-phosphate dehydrogenase deficiency)(يعني نقصان انزيم موجود بالكريات الحمر في
حالة تسمى حساسية الباقلاء فتتحلل هاي الكريات وتتكسر قبل ميحانهه يعني عمرهه يقصر)
وحالة فقر الدم المنجلي (sickle-cell
disease) أو أي حالة تموت بيهه الكريات
الحمر من وكت. وبعد أكو حالة وهي التبرع بالدم وهنا راح يقوم الجسم بتكوين كريات
حمر جديدة وشباب بدل اللي تبرع بيهن الشخص وهذا يعني ان هذه الكريات بعدهه نظيفة
وما بيهه سكر تراكمي فيطلع النتائج اقل من المتوقع. والعكس ممكن أن يحدث ، يعني
اذا طال عمر الكريات مثل حالات نقصان فيتامين ب12 أو الفولات (FOLATE ).
س21/ زين هسة شتكول ليش ما أعتمد على السكر التراكمي بتشخيص السكر وماكو
داعي أن أقيس نسبة السكر واني صائم مثلا؟
ج21/ لا منكدر . قياس نسبة السكر مهمة حتى ننطي العلاج على اساسه بس السكر
التراكمي منكدر نعتمد عليه لأنه مثل ما عرفنه هذا تراكمي يعني مو مال اليوم أو قبل
ساعة أو ساعتين وميتأثر بصعود ونزول السكر بالدم بسرعة. هسة صارت الفكرة واضحة؟
س22/ زين كل شكد لازم نسوي هذا الفحص بالسنة؟
ج22/ لازم نسويه مرتين بالسنة للأشخاص اللي مسيطرين على نسبة السكر عدهم
وأربع مرات للأشخاص اللي عدهم السكر ما مستقر أو هم غير ملتزمين بالعلاج
والتوصيات.
https://www.youtube.com/user/alient67/videos
